Cymdeithas Hanes Mechell

Sefydlwyd y Gymdeithas Hanes yn 2007 yn dilyn lansio llyfr y Parchedig Emlyn Richards, Bywyd Gwr Bonheddig, sef William Bulkeley. Roedd William Bulkeley yn frodor o Lanfechell ac fe fu’n cadw dyddiadur am y cyfnod 1734-1760. Mae’r dyddiaduron a oroesodd, bellach yng ngofal Prifysgol Cymru , Bangor, ond fe benderfynwyd yn lleol fod y record yma o hanes Llanfechell a’r cylch yn y cyfnod yma yn werthfawr ac y dylid gwneud defnydd llawn ohonynt. Yn ogystal â’r defnydd o’r dyddiaduron ysgogwyd nifer o bobl leol i ymchwilio i hanes rhai o frodorion Llanfechell a digwyddiadau hanesyddol yn y pentref ac mae’r gymdeithas yn mynd o nerth i nerth.

Mae’r Gymdeithas yn cyfarfod ar yr ail ddydd Iau o bob yn ail mis. Byddwn yn trefnu rhaglen flynyddol sydd yn cael ei gyhoeddi ac i’w weld ar y wefan.

Pan sefydlwyd y gymdeithas, penderfynwyd creu gwefan fel ffordd o gofnodi’r gwaith a gyflwynir pob deufis, ac fe welir nifer mawr bellach yn y Gymraeg a’r Saesneg.

Hefyd cyhoeddwyd llyfr o gynnwys y wefan a bellach rydym wedi gwerthu oddeutu cant o’r fersiwn Cymraeg a chant o’r un Saesneg.